সোঁৱৰণিৰ বালিচৰত – ২

মাটিত আঁচ টানি দুই ফালে পাঁচটা পাঁচটা ঘৰ বনাই এটা ভৰিৰে জঁপিয়াই জঁপিয়াই খেলিছিলোঁ । ভঙা মাটিৰ বাচনৰ টুকুৰা বোৰৰ পৰা ঘঁহি ঘঁহি গোলকৈ গুটিবোৰ বনাই লৈছিলোঁ ।

ৰুমাল চুৰি আন এটা ভালপোৱা খেল আছিল । লগতে চেংগুটি ও খেলিছিলো । মই অবশ্যে আঙুলিৰ গাঠি ডাঙৰ হয় বুলি মায়ে কোৱাৰ বাবে সেই খেলটো কমকৈ খেলিছিলোঁ। তথাপিও নিজৰ পচন্দ অনুসৰি গুটিবোৰ বিচাৰি বিচাৰি জমা কৰিবলৈ পাহৰা নাছিলো ।

অাচলতে এই খেলসমূহৰদ্বাৰা সৰু ল’ৰা-ছোৱালীবোৰে ঘৰৰ চোঁতালবোৰ পৰিপূৰ্ণ কৰি তুলিছিল লগতে সেইবোৰে আমাৰ মাজত মৰম-চেনেহ আৰু আমাক একতাৰ এনাজৰীৰে বান্ধি ৰাখিছিল ।

ইলেক্ট্ৰনিক যান্ত্ৰিক যুগত ক’ত যে হেৰাই গ’ল সৰু সৰু শিশু বোৰৰ সেই সোনোৱালী দিনবোৰ ।

PUBG(Player unknown’s battle grounds)য়ে এতিয়া সকলোকে ব্যস্ত কৰি তুলিছে ।ছাত্ৰছাত্ৰীৰ ওপৰিও সৰু ডাঙৰ সকলোৱেই ব্যস্ত হৈ পৰিছে । বাছত , দোকানত ,ৰাস্তাত ,ৰেস্ত’ৰাঁ সকলোতে PUBG । শিক্ষকৰ পৰা আদি কৰি ডক্টৰৰলৈকে সকলো ব্যস্ত PUBG লৈ । COC(Clash of clans)ও ইন্টাৰনেটৰ আন এক জনপ্ৰিয় খেল । এইবোৰ লৈয়ে সকলো ব্যস্ত । কি ডাঙৰ কি সৰু সকলোৱেই ব্যস্ত এতিয়া মবাইল আৰু হেডফ’ন লৈ COC আৰু PUBG খেলিবলৈ । হয়তু আমাৰ দিনত এইবোৰ দেৰিকৈ আহিছিল বাবে জীৱনৰ ৰংবোৰ বেলেগকৈ উপভোগ কৰিছিলো । কিন্ত্ত এতিয়া জন্ম হৈয়েই কান্দিব বুলি বা ছোৱাচিতা কৰা মানুহ নাই বুলিলেয়েই এইবোৰ সিহঁতৰ হাতত তুলি দিয়া বাবে , টিভিৰ সন্মূখত বহাই কাৰ্তুনছবিবোৰ চাবলৈ দি সময়বোৰ পাৰ কৰাব বিছাৰি ফুৰাৰ বাবে সিহঁতৰ জীৱনৰ ৰংবোৰ বেলেগ হৈ পৰিল । অভিভাবকৰ বিভিন্ন ব্যস্ততা , অকলশৰীয়া পৰিয়াল ,বিভিন্ন অসুবিধাবোৰে,কাঢ়া ৰুটিনৰ জীৱন যাপনে সিহঁতক অকলশৰীয়া কৰি তোলাৰ বাবে সিহঁতৰো জীৱনবোৰত মবাইলে বেচিকৈ ঠাই লাভ কৰিলে । সেই সোনোৱালী দিনবোৰৰ মাদকতা সিহঁতৰ ঘৰ বা কোঠালিটোৰ ভিতৰতেই আবদ্ধ হৈ থাকিল ।
তথাপি জীৱনৰ সেই সুন্দৰ সময়বোৰ চাগৈ এদিন মোৰ দৰে সিহঁতেও সিহঁতৰ অনুভবেৰে প্ৰকাশ কৰিব ….
” মবাইল – ইন্টাৰনেট – টিভিৰে আমাৰ সোনালী শৈশব ।”